بعيد عن السياسه و مصر اللى واجعه دماغى ليل نهار بيها
الموضوع دة
just for fun
قعدت انا وواحدة صحبتى بليل كدة على النت بنهيس
وقررنا نتخيل انها مذيعه وانا الضيفه وتعمل لقاء تلفزيونى معايا
وابتدأنا الكلام وكله كان ارتجالى منها وبدات ارد بصراحه و بعد كدة ظهرت فكرة اننا نحط الكلام على الفيس
وكان فيه كلام مضحك جدا برة الكواليس محطوط اللينك بتاعه تحت فى نووت منفصل على بروفايلها هى
فى الاخر بس احب اقول انى بجد استمتعت اوى
Amal Samir:مساء الخير
مرة اخرى سيداتى انساتى وسادتى نرحب بضيفتنا وضيفة الفيس بوك الليله مويا محمد
Moya Mohammed:اهلا وسهلا بيكى يا امال والياهوو منور بيكى
Amal Samir:نعرف حبة بيانات شخصية
الاسم بالكامل؟
Moya Mohammed:مويا محمد عبد العظيم اسماعيل
واسم (مويا) مش الحقيقى ,بس انا بحبه اوى وبحب كل الناس تنادينى بيه
اخواتى كمان بينادونى بالاسم دة وكأن اسمى الحقيقى اتمسح
بعتز باسم مويا دة اوى عشان دة الاسم اللى والدتى الله يرحمها كانت بتنادينى بيه دايما وعشان كدة بحبه
واى حد بيعرف الاسم الحقيقى ,بيبدا ينادينى بيه وانا مش بحب كدة
انا بحب مويا اكتر و بالمرة نخلى الاسم الحقيقى والرسمى للرسميات بس
Amal Samir:السن وتاريخ الميلاد ومكان ومحل الميلاد؟
Moya Mohammed:شهر ابريل اللى جاى هكمل 21 سنه
تاريخ ميلادى هو 4 ابريل1990 ومكان الولاده هو مستشفى الماترناتيه-اسكندريه
Amal Samir:محل السكن والحاله الاجتماعية وإتكلمى عنها؟
Moya Mohammed:الابراهيميه على الترام,والحاله الاجتماعيه مخطوبه لـ (محمد عبد الحميد) ساكن فى نفس عمارتنا وكنا مع بعض من اولى حضانه وعندة 23 سنه ويعمل باحدى فنادق محطه الرمل
الغريب بقى يا امال,مع انى عاملها كدة على الاكونت هنا على الفيس,بس محدش لاحظ انى مخطوبه وناس كتير كمان
Amal Samir:هههه
كلمينا عن العيلة بقى
Moya Mohammed:والدى محمد عبد العظيم 57 سنه
عندى اتنين اخوات اصغر منى
احمد:ان شاء الله(ياااااااااااااااااااا رب) اشوفه فى اولى هندسه السنه اللى جايه بس هو يذاكر ويشد حيله
منار: فى تانيه اعدادى
Amal Samir:مش هسألك على المهنة علشان عارفه انك لسه طالبة وبتدرسى
بس هسألك لية مش بتحبى تقولى انتى فى كلية ايه-مع العلم انى عارفها-؟
Moya Mohammed:انا بستغرب ان السؤال جاى منك انتى يا امال
انتى اللى اقنعتينى ان الانسان مش بتعليمه
ياما ناس كتير معهاش شهادات,وعلى كدة مخها يوزن بلد
مش بحب اقول انا بدرس ايه لسببين
السبب الاول ان اللى بيسأل بيكون واد غلس داخل فتح الشات ولقانى اونلاين فدخل يكتب:هااااااى ممكن نتعرف
والنوعيه دى من البشر مش بحبهم خصوصا انهم حشريين اوى
ويبدأ يهزر ويكون الهزار بايخ,وانا اصلا مش بطيق ان حد يهزر معايا معرفوش
فأنا مش بخليه (ياخد عليا واخد عليه) بالطريقة دى, انى مش اقول انا بدرس ايه
السبب التانى هو اقناعك ان مش مهم فعلا انا بدرس ايه طالما الشخصيه والعقل والتفكير والفهم حلوين
Amal Samir:اهتمامتك اية بقى؟
Moya Mohammed:الصحافه والادب والقراءه والكتابه وسماع الموسيقى وانى اروح النادى
Amal Samir:هبدأ اقتحم شخصيتك واحدة واحدة
امتى آخر مرة بكيتى؟؟
Moya Mohammed:دموعى غاليه اوى عندى يا امال وانتى عارفة كدة كويس
مش لأى سبب تنزل دموعى اصلا,بس ساعات ببقى فى حال ربنا كدة وببقى عايزة اعيط واصوت بسبب ان البكا مفيد للأنسان
اخر مرة بكيت كان فى 2003 لما والدتى توفاها الله
ومش بكيت قدام اخواتى كمان
Amal Samir:احنا مع بعض من 10 سنين يا مويا,اية رأيك فيا
Moya Mohammed:لو ربنا امر انه تتخلق امرآه توصل لحد الكمال,هتكون انتى يا امال
Amal Samir:ميرسى كتير يا مويا,اية موضوع كلامك فى السياسة على طول واية اتجاهك السياسى؟
Moya Mohammed:انا عايزة اغير يا امال نفسى فى حياه افضل لمصر اللى المفروض انا بنتمى ليها
من الطبيعى انى اكون عايزة الاحسن
انا كنت حزب وطنى عشان كنت بميل له اكتر
هو عمل انجازات كتير,محدش يقدر ينكر انه عمر سيناء وحط فيها سياحه وان اسرائيل ماتعرفش تضربها تانى
كنت قريت نووت عن حاجه زى كدة,بس حاليا عيوبه بقت اكتر من مميزاته
عشان كدة كنت: فعل ماضى يعنى
Amal Samir:شايفة نفسك اية؟
Moya Mohammed:شايفه نفسى صحفيه كبيرة
شايفة نفسى برضة وزيرة تربيه وتعليم
مش عيب انى احلم ببلد احسن,هم خلوها عيب
حتى التفكير بيحاربوه دلوقتى
انتى شايفة نفسك ايه يا امال؟
Amal Samir:شايفه نفسى رئيسة الجمهورية بحالها
اية موضوع الصورة صح اللى مش بتتغير دى؟
Moya Mohammed:قبل الصورة,فعلا انتى من نوعيه الناس اللى تنفع تقود البلد مخك نضيف عموما ودى عشرة 10 سنين بحالهم
صورة البنت اللى قاعدة على القمر بقى
صورة الياهوو ميل هى بنت ماسكه سلاح وواقفه فى ضوء القمر
انا بحب القمر عموما وبحب السما لما يكون القمر مكتمل
بحب البحر اوى فى ضوء القمر,حتى المدونه بتاعتى اسمها ضى القمر
صورة البروفايل قليل عليها اوى اصف اللى بحس بيه فى مجرد كلمات بشريه
بس هى صورة فيها وحدة وسكون وقوه وتميز
وعشان مش هحط ولا بحط صور ليا على الفيس عشان بتتسرق خصوصا ان الموضوع دة حصل مع واحدة صحبتى
فالصورة دى اصبحت صورة البروفايل بيك على طول
حاجه كمان,
اسمى(مويا) دة متميز ان مافيش حد بالاسم دة
عدم تغيير صورة البروفايل دة كمان شئ متميز خصوصا انى بحط الصورة بأستايل مختلف كل مرة
الاسم دلوقتى بقى مقترن بالصورة,والصورة بقت مقترنه بالاسم
لما حد يشوف الصورة دى يفتكر مويا
ولما حد يشوف اسم مويا يفتكر الصورة دى
Amal Samir:عندك كام فرند وكام صاحب او صاحبه وكام صديق وصديقة؟
Moya Mohammed: ذكاء منك يا امال انك صنفتيهم كدة الصراحه خصوصا ان فيه ناس هتقرأ الكلام دة
انا عندى حوالى 6 مليار فرند
انا صديقة للعالم وبميل للسلام بطبعى
منهم 485 عندى على البروفايل
انا صديقه لكل الناس
عندى حوالى60 صاحب ودول ناس ليهم معزة شخصيه بس العلاقات بينا مش بيرفكت بسبب حاجه واحدة بس اللى هى بعد المسافه ودول كتير منهم موجود على الفيس
اغلبهم من القاهرة,انا اقصد عموما المدونين وبجد ناس اتشرف بمعرفتهم واتمنى انى اقابلهم فى يوم
عشان انقلهم لمرحله الصديق والصديقة
عندى بقى 15 صديق وصديقة ودول بعتبرهم دمى
ناس مستعدة اموت عشانهم
Amal Samir:مش اقصد عالم الاحلام والنوم والكلام دة
سؤالى بيقول: حلم بتحلمية,وكابوس نفسك مايحصلش
Moya Mohammed:بحلم ان مصر تتقدم عموما
الكابوس انى اطلع غلط ومش اقصد فى الموضوع دة بتاع مصر
فى اى موضوع بجد بيضايقنى اوى انى ابقى غلط ف حاجه
كابوس وحش اوى ,انى ابقى غلط
Amal Samir:مويا زمان ومويا دلوقتى,ايه الفارق؟
Moya Mohammed:زمان احلى عموما,كانت كل حاجه حلوة
دلوقتى الانسان بينمو وبيبقى اصلب واقوى مع الزمن
حنيه زمان بتروح وجمال زمان بيختفى
نفسى ارجع صغيرة تانى
Amal Samir:شايفة نفسك مين من بلاد العالم
Moya Mohammed:حاسه انى زيها اوى فى كل حاجه
لما تزعل,انا ازعل,ولما افرح,هى تفرح
حاسه انى مـصــر
وانتى؟
Amal Samir:المفروض ان انا المذيعة يعنى انا اللى اسأل بس
بس بما انك سألتى
انا كمان مصر
Amal Samir:انا عارفة انك زرتى بلاد برة مصر,اية احسن مكان فيهم واية المكان اللى تتمنى تزورية بعد كدة علشان تقضى اجازة او رحلة العمر
Moya Mohammed:انا زرت الامارات وفرنسا قبل كدة
بجد فرنسا جميله جدا,منساش طبعا متحف الورد هناك جميل جدا
حاجه بجد رهيبه
هناك بيحبوا المصريين اوى
المكان اللى نفسى اروحه بجد,هاواى
نفسى كدة اقعد على الشاطئ هناك واغرس رجليا فى الرمال الدافيه وقدامى الشمس هاتغيب فى البحر ولون المياه الفيروزى كدة رائع جدا
اشغل بقى موسيقى هاديه من النوع اللى بحبه
وبس....مستعدة اعيش حياتى كلها بعمل كدة
نفسى حتى اموت على المنظر دة,اصل مش هاكون عايزة شئ تانى من الدنيا
Amal Samir:يا عينى على روقانك
بتحبى ايه بقى من الالوان ومن الارقام؟بتحبى الشتا اكتر ولا الصيف
Moya Mohammed: بحب الارقام عموما
بس اكتر رقم بحبه هو1 ومعاه رقم3 فى نفس المربته بالظبط ومايقلش عنه و بحب كل الالوان لكن اكتر لون بحبه وبرتاح له هو البنفسجى الغامق
بحب الشتا علشان...........بحب الشتا وخلاص
بس مايمنعش انى اكون بحب الصيف
بحب الصيف برضة علشان روقانه وانه الاجازه
هههههههه
Amal Samir: ايه زوقك فى الموسيقى و ايه نوعية الاغانى اللى بتسميعها
ايه اكتر اغنية بتحبيها ومين اكتر مغنى ومعنية بتحبيهم؟
Moya Mohammed:زوقى انا شايفه انه عادى,مزاجى بمعنى اصح
اكتر اغنيه بحبها
مابحبش حد يشوف اى دموع فى عنيا-انغام
اكتر مغنى بحبه هو عمرو دياب وراه كاظم الساهر و راغب علامه فى مرتبه واحدة
اكتر مغنيه بحبها طبعا طبعا طبعا طبعا الملكه انغام
اصلا مافيش حد وراها فى المركز التانى
المركز التالت فيه جنات
عموما بقى اسمع كل دول وعليهم اجنبى
karl wolf,eminem,jojo,milk&hony,linkin' park,julio iglesias,metalica,TATU,Micheal jackson,celine dion ,shaggy,eagles,my chemical romance,demis roussos,maddona,pussy cat dolls,evanescence
وطبعا طبعا طبعا الملكه
britney spears
Amal Samir:لازم تعترفى بسر
Moya Mohammed<:ايه الاحراج دة
ههههههههههه
طب ماشى
هو ماينفعش ان بنت تعمل كدة اصلا
بس كتير اوى بهرب من البيت واروح ابات الليله عند جدتى لما ببقى متخانقه مع ابويا
Amal Samir:امتى بتحسى انك مخنوقة,وبتعملى ايه وقتها
Moya Mohammed:لما ببقى متخانقه مع بابا
يأما بروح لواحدة صحبتى (انتى او ناردين او ياسمين)واقعد افضفض معاها او اروح اقعد على البحر لوحدى
Amal Samir:اية رايك فى نفسك؟
Moya Mohammed:كل واحد اتولد وله هدف فى الحياه
شخصيتى ونفسى حلوة,استحق انى اعيش عموما
وهقدر اغير اللى حواليا,دة هدفى فى الحياه
Amal Samir:اية اغرب احساس فى حياتك؟
Moya Mohammed:اعتبرى دة السر اللى بتسألى عليه عشان دى اول مرة اقوله فعلا
كان فية بنت معايا فى المدرسه من ابتدائى والميس قالت انها لو ما علقتش اللوح وعملت الواجب 5 مرات فهى هترفدها
انا علقت اللوح وانا اللى مسكت كراستها فى البريك وعملت الواجب بتاعها
اولا مكنش ليا مزاج انزل البريك عشان صحابى كانوا كلهم غايبين وكدة كدة مافيش حد العب معاه
الميس كانت فخورة بيها ومش عاقبتها واديتها جايزة تانى يوم
احساس انى عملت خير واتنسب لحد تانى,دة اجمل احساس فى حياتى كلها
احساس ان شفتى بتضحك وعنيا عايزة تدمع
اللحظه دى منسهاش مع انها كانت فى 2 ابتدائى
Amal Samir:واية اغلى حاجه عندك؟.
Moya Mohammed:انتوا واخواتى
مستعدة احارب واقتل او اتقتل عشانكم
Amal Samir:كل بن ادم مصرى لة لازمة فى بقو
انا ملاحظة انها كلمة(افندم) ومع انها تخض بس انتى دايما بتستخدميها
برضو فية ناس بتزعل من اسلوبك كلامك خصوصا على الفيس
كلمينا عن الموضوع دة
Moya Mohammed:كلمه (افندم) دى فعلا زى اللبانه فى بقى وناس كتير فعلا بتقول انها مش عاجباهم
نيجى بقى للاسلوب
والله انا اسلوبى كدة,النت مفهوش مشاعر عشان يعرفوا انا بكتبها بنيه صافيه او بحط فيه غضب
لما بيحصل كدة انا بتغاظ وبتعصب ان الانسان اللى قدامى دة فهم كدة منين؟مع نفسه يعنى
وساعتها فعلا بيبقى اسلوبى عصبى فعلا
Amal Samir:ايه العيب اللى فيكى؟
Moya Mohammed:العصبية,ودى محدش يعرفها او يتوقعها منى
اناا عصبيه بشده
ناس كتير فاكرانى هادية
Amal Samir:ع الفيس,اية اللى بيعصبك وامتى تحذفى فرند؟
Moya Mohammed:الناس الاغبياء اللى على الشات
ودول نسبتهم 2% ودة بسبب انى فاتحه الشات على طول
دول بيعصبونى
بمسح فرند لما يغلط فيا شخصيا او يجى على كرامتى
كرامتى مستعدة اقتل علشانها
بمسح فرند لما يشتم قدامى,لان من قله الادب انه يشتم قدام بنت
وبمناسبه الفيس بوك
ناس كتير هتعمللك ادد بسبب لقائك دة معايا,ايه ردك
Amal Samir:لا هرفضهم كلهم طبعا
انا عندى 42 فرند منهم 40 اعرفهم شخصيا
على العموم
وصلنا لأخر اللقاء يا مويا
ايه السؤال اللى كنتى حاطاه فى بالك تتسألية,وانا مش سألته
وايه اجابته؟
Moya Mohammed:همممممممممممممممممممم
لا الصراحه مكنتش عامله حساب حاجه
بس كنت مستعدة اجاوب على اى حاجه
Amal Samir:مويا محمد من الاسكندريه
اسمتعت معاكى والى لقاء اخر ان شاء الله
Moya Mohammed:انا اسعد يا اموله يا جميله وميرسى ليكى
وعلى طول تبقى مذيعه مشهورة كدة ان شاء الله
لينك كلامنا برة الكواليس ع الفيس بوك
ليست هناك تعليقات:
إرسال تعليق