كتبت بتاريخ9 سبتمبر2010
اولا كدة بعد ال4 مرات سـحور..والطن ونص سوبيا اللى شربتهم
وما ادراكم ما الانتخه فى ذلك
وبعد عدة مواضيع اتفتحت امامى فجعه كدة
المهم
من اول امبارح(قبل ما رمضان يخلص رسميا بساعات) جه فى بالى السؤال دة
ليه رمضان؟؟
شهر رمضان الذي انزل فيه القرآن هدى للناس وبينات من الهدى والفرقان
تصدقوا اكتشفت اننا محتاجين اوى
وغلابه اوى اوى
ربنا يكون فى عوننا احنا المصريين
عارفين محتاجين ايه؟؟
محتاجين متش زى متش الجزائر عشان يوحدنا..كأن مايفنعش نبقى ايد واحدة من غير الجزائر
محتاجين خالد سعيد يموت عشان نطالب بحقوقنا..وكأن ماينفعش نطالب بيها من غير ما حد يموت
محتاجين شهر عشان نقرب فيه من ربنا وبعد الشهر نرجع تانى..وكأن ماينفعش نقرب من ربنا الا فى خلال وعشان شهر
مجرد شهر
كان هايحصل ايه لو القرآن نزل فى شعبان..او رجب
وليه بنقرب من ربنا فى رمضان بس؟
هو القرآن لا يقرأ الا فى رمضان؟؟
ولا الصيام لا يكون الا فى رمضان؟؟؟
طب ساعتها..ايه لازم باقى شهور السنه؟؟
ايوة..بقولها وبعيدها
رمضان مجرد شهر عادى
احتفل فيه بليله القدر..ذكرى لنزول القرآن فيها
لكن
هايفضل مجرد شهر
عشان (انا) مش محتاجه الجزائر توحدنا
ولا محتاجه متش عشان انزل الشارع بعلم مصر
ولا محتاجه خالد سعيد يموت عشان اتكلم على الحقوق والواجبات
وبالتالى
اكيد مش هحتاج شهر عشان اتقرب لربنا اكتر
وبالمناسبه دى
كفايه بجد موضوع التاجات فى الصور بتاعه التهانئ بمناسبه رمضان والعيد
وبعيد عن انى خاطيه وربنا يرحمنى ويغفرلى لانه هو الوحيد علام القلوب
احنا ليه بجد محتاجين رمضان عشان نعل فيه الخير؟؟
طب للدرجه دى حالنا بقى وحش اوى لدرجه اننا كلنا-وانا منهم وبعترف- ان رمضان كان تقيل علينا السنه دى؟؟
عايزين رمضان يخلص بسرعه عشان نرجع لحياتنا الطبيعيه
فككوا من التدين..معظمنا مش متدينين اوى وتقريبا صمنا رمضان بالعافيه
بس دة ينقلنى لموضوع تانى اتكلمت فيه قبل كدة من حوالى سنه وشهرين بالظبط
قلت-فى نووت قديمه فى بروفايل قديم-قلت:واهلك فى البيت مفتقدينك وانت حاسس انهم بيعاملوك وحش كل دة عشان انت بتقعد حوالى9ساعات على الكومبيوتر
مش حرام عليهم فعلا ان اهلك بيضطهدوك؟؟
مهو رمضان بقى كدة...احنا عايزينه يخلص عشان نكمل حياتنا
ومش بتكلم فى التدين...لتانى مرة بقولها
بتكلم على المصريين اننا غلابه اوى لدرجه اننا محتاجين حاجه تخلينا نعمل حاجه
بتكلم على الجزائر...ورمضان...واسرائيل
مبنعرفش نعمل حاجه من تلقاء نفسنا
دة مرض فينا احنا المصريين
زى الكسل بالظبط
بس الميزة فينا اننا نقدر..دة احنا اللى عملنا من الفسيخ شربات
****************************************************
- نكته لتلطيف الجو:مره واحد بيعاكس واحده قالها: عسل يابنت النحله
- بصت له وقالت : وانت قشطه يابن الجاموسه
ليست هناك تعليقات:
إرسال تعليق