مرحلة ما بعد الولادة

فى25 يناير 2011..المخاض ابتدا

الطفل كان بيقاوم بعنف علشان يخرج للنور.. يخرج للهوا
زهق من انحناء الظهر اللى بيعانى منه جوة الرحم
زهق من انه يتلقى الاكل و الاوكسجين عن طريق السائل الامينى
اللى بيحاوطه...و بيعزله عن كل حاجة

كان بيسمع عن الهوا..عن انه يقف قدام البحر و يفرد ايدية
عن انه يشقى و يتعب فى الاكل اللى بيجيله...عن انه يفرد ظهره
كان نفسة يتحرر من الحبل او القيد اللى بيربطه بالرحم الضيق دة
كان بيقاتل علشان الحرية


فى الحقيقة...الولادة كانت عسيرة اوووى
يوم 28 يناير حصل نزيف دم جامد
ناس قالوا ان الطفل مينفعش ينزل بدرى
دى كلها فترة و هتعدى
الطفل لازم يصبر لحد ميعاد الولادة، دى فترة قصيرة يعنى
و فيه ناس قالوا:نزيف؟؟ يبقى مش هيستحمل و هيموت


بس الطفل كان له رأى تانى
الدم اللى نازف دة كان علشان الطفل قطع اخر قيد يربطه بالرحم الضيق دة
الحبل السرى
و هنا...الطفل مكنش ينفع يستنى المدة المحددة دى
يأما يموت...او يُعطى حياة
و اراد الله .. و سعىَ الطفل
و اتولد يوم 11 فبراير 2011
هو دة ثمن الحرية....الدم


و دى كانت ولادة مصر
اللى قلنا عليها: بيبى صغير لساه بيحبى
و هيتعلم المشى..و هيكبر و يتعلم احسن تعليم
و هيبقى عندة امل فى ربنا  و فى بكرة
هيبقى حر انه يقف قدام البحر و يفرد ايدية
و يفرد ظهره و هو واقف على جبل سانت كاترين و يشم احلى هوا


و عدت سنة
المفروض ان البيبى يتعلم المشى
و يتفطم..و يبدأ يعتمد على نفسة
لكن مفيش حاجة من دى بدأت تحصل حتى
عظام جسده ضعيفة لأنه لا يتعرض حتى للشمس
لا يقف عليها..و ياكل نوع واحد من الاكل فقط
و علشان كدة...جاله مرض
اسمه العسكر


الخلاصة بقى
العسكر فعلا مرض
و مرض قاتل فى السن الصغير للثورة دة
و بأختصار, يوم25 يناير هو تحدى للطفل دة
يأما يرفض و يقاوم المرض دة زى ما عمل قبل كدة و قاوم
و يكسب المرض دة و يخرج للحياه
يأما هيموت...وهنموت


أقسم بالله العظيم
احنا مش هندوخ تانى
احنا مش هنضيع وقت تافه تانى
احنا عندنا قابليه اننا نعيش احرار
نعيش ببساطة و حرية و نظافة و بأحترام
مبدأ ان هم كبار و اننا تحت
ان هم الاسياد
ده مبدأ تكبر
اقسم بالله هننتصر
و اقسم بالله اننا هنحمى ثورتنا
هنحمى الطفل اللى اتولد دة مهما كان الثمن
حتى لو الثمن دة دم..لأن الدم ثمن رخيييييييييييص اوى مقابل حاجة انا بحبها
اللى هى مصر
احنا اللى عملنا مصر
و احنا اللى هنحميها
والله على ما اقول شهيدة


فى 21 يناير2011 كتبت الكلام اللى جاى دة
مكنتش متخيلة انى هنقلة كوبى من غير ما اعدلّه حتى
 فى تدوينة اخرى فى نفس التاريخ
علشان مفيش حاجة اتغيرت.


ضى القمر- مصر(21يناير2011)
---------------------------------------------------------------
يوم25يناير اللى جاى انا كبنت هنزل الشارع علشان اجيب حقى
فى اليوم دة انا هنزل بالعلم,يأما ارفعه عالى وارفع راسى معاه

يأما هرفعه بالمقلوب احتجاجا على سوء اوضاع مصر لحد ما تتعدل

ويااااااااااارب تتعدل فى اليوم دة بجد25 يناير

يارب بجد علشان انا مش مستعدة اشوف ايام وحشه علينا كمصريين تانى

مهو مش حرام انى احلم ببلد حلوة

وعلشان كدة لازم نتحرك

اصبحنا نعيش فى وطن تسوده الفوضى والبطلجه
وكأن ما يحكمه هى  قوانين الغاب وفقا لعصر جديد مظلم

ويتحكم به مجموعه من البلطجيه وفقا لاهوائهم الشخصيه وليس بناء على تحمل مسئولية تجاه الشعب او الوطن

حيث تفكك الوطن وبدا فى محاربه نفسه  ونزف دم شباب ابرياء كل  ما اقترفوه من جرائم كان:حبهم لهذا الوطن

حيث انعدمت الثقه فى الحكومه واذداد الفساد وانعدمت قيمه المواطن المصرى وقد فقد الامل فى تغيير حياتى على كل المستويات

ونتيجه لذلك اصبحت اللامبالاه والتجاهل هى جزء يومى من حياه المواطن المصرى

وهو ما يشير الى موت النفس المصريه وتحولنا لعبيد لا نشعر بشئ مما حولنا

واشاره ايضا لفقدان شباب مصر لكل معانى الانتماء والحب

وما بين مواطن مصرى مؤيد لـ(أكل لقمه العيش مهما كانت) واخر مؤيد لـ(التغيير)حتى لا تظل رؤوسنا فى الرمال من الحزن

فقدت مصر هويتها

سوء الاحوال فى مصر وتونس متشابهان, فى حين ان  احرار تونس قرروا الا تموت النفس التونسيه,فثاروا وانتفضوا على الظلم والقهر

وكأن المصريين نفوسهم ماتت فعلا وتلاشت عزة النفس وسادت الامراض المجتمعيه الخبيثه المؤرقة استعدادا لموت مصر ذات نفسها

اتمنى الا نكتفى بأحتجاجات الانترنت والفيس بوك فقط

بل ينبغى ان تخرج الجماهير المصريه مثلما فعل احرار تونس ليعبروا عن غضبهم

فمصر ليست موجوده على الفيس بوك,مصر هى واقعنا الذى نعيشه ونعانى منه


--------------------------------------------------

النووت كدة خلصت
بس عندى كلمه اخيرة:
احنا لو متنا..و الثورة ماتت
هيجى جيل  تانى غيرنا و يثور
يمكن بكره..يمكن بعده..يمكن كمان الف الف سنة
بس الاكيد انه هيجى
علشان مصر ولادة
و اعرفوا ....... ان اللى خلف مماتش
:)

بلاش تعمل شير

الناس اللى بتشير اخبار عن حزب الاصاله السلفى قال ايه؟
*و بيان جماعة التكفير و الهجرة للى عايزيين يعملوها فى مصر
*و بيان حزب النور عن لجنه الامر بالمعروف و النهى عن المنكر
*و الناس اللى بتكتب:مش هحتفل بالكريسماس لانى مسلم..و مش هعيد على المسيحيين لأن انا مش بعترف بعيدهم


احب اقول:الناس اللى بتكتب كدة قصدها تعمل فتنه وتولعها
الناس اللى بتكتب كدة متحالفة مع اسرائيل(مقابلة حزب النور مع راديو اسرائيل و رئيس الوزراء)
و متحالفة كمان مع امريكا(ابو اسماعيل لما قال بشرى خير على زيارة جون كيرى)


يعنى بالبلدى كدة الناس دى بتلعب لصالح امريكا و بتحقق مخططها ان تحصل فتنه 


فمثلا:الاقباط يطالبوا بحماية دوليه فيحصل تقسيم لمصر ارضاء للطرفين,زى ما حصل للسودان


انا غير مؤمنة بنظرية المؤامرة
بس اللى بيحصل دة مش مؤامرة..دة هدف هم بيسعوا له
(فرق تسد)


المهم يعنى الناس اللى بتكتب كدة غرضها الفتنة و شعللتها
فأنت تيجى تكمل و تعمل شير علشان تتاريق؟؟؟


صدقنى,دة بيحز فى نفس الناس و بتكتم جواها
صديقى...بلاش تعمل شير للقرررررف اللى زى دة

ملحوظة:ممكن تعمل شير للتدوينة..او تقتبس منها
المهم الفكرة توصل

صناعة المستقبل

       يتحدث البعض عن المجمع العلمى الذى حـُرق فى القاهرة فى الاحداث الاخيرة..و يبالغون فى وصف و تقدير المحتويات التاريخية
بينما يتكلم اخرون عن الاحداث التى تحدث و يبالغ البعض تهكما: كيف سيذاكر الاطفال منهج التاريخ مستقبلا
بينما اخرون مهتمون بما تكتبه الجرائد و كيف عناوينها ستصبح تاريخية..و كيف اعدادها ستصبح للذكرى و كيف صورها و تحقيقاتها هى صور و تحقيقات للتاريخ....و يتحدثون عن: كيف سيقصون على مسامع اطفالهم  كيف وقفوا فى الصفوف الاولى و كيف ثاروا و انتفضوا فى يوم 25 ينايرمن عام2011


      بصراحة شديدة..انا لا اهتم مطلقا للتاريخ
انا لا اهتم للجرائد..انا لا اهتم كيف سأقص على ابنائى و احفادى ماذا حدث
انا لا اجمع الجرائد حتى..لا اهتم كيف سينظر الاطفال إلينا و هم يذاكرون منهج التاريخ فى المستقبل البعيد


       فى الواقع..انا لا اقف فى الصفوف الاماميه ولم أثر و انتفض فى يوم25 يناير و لم انزل الى الشوارع معبرةً عن غضبى ... ليكتب عنى التاريخ
لم يشغل بالى ذلك و انا اقف اما الرصاص..و انا اهتف ضد مبارك و حبيب العادلى,ايضا لم يدر ذلك بخلدى وانا اهتف مؤخرا ضد العسكر
لم افكر فى(كيف سيتكلمون علي..و ماذا سيقولون)
لم افكر فى(ماذا سأقول لأطفالى فيما بعد)
لم افكر و لو لجزء من لحظه واحدة فى صناعه التاريخ
لم ابالى فى الواقع بما يحدث حولى:
   *هذا شهيد قد سقط..حسنا,تقبل الله منه.لكن المهم ان نصل "نحن" لغايتنا..وهى التحرر
   *لقد اُصبت..حسنا,ماذا يهم  إن مُتْ..المهم ان تصل مصر لحريتها
لم ابالى اطلاقا بما قد يُقال عليَ لو كنت مُتْ شهيدة...المهم عندى هو ان أموت انا..ليحيا ملايين غيرى فى الحرية




        لم و لن اكترث بما سوف اقوله عن التاريخ لأطفالى..او  ان اجمع اعداد الصحف لأجعلهم يروها
المهم عندى هو المستقبل
قد اموت فى اى وقت..وبالتالى لن يكون هناك تاريخ احكى لأى احد عنه
لكن سيكون هناك مستقبل لمصر
كل ما كنت افكر فيه و انا اقف امام الرصاص و جنود الامن المركزى و انا اهتف ضد مبارك و العادلى والحقير طنطاوى...............هو المستقبل, مستقبل مصر
كيف ستكون مصر فى المستقبل(ان كنت ميتة ام حيه)
كيف سأغيرها
كيف تكون مصر..افضل


عفوا,نحن لا نصنع التاريخ....نحن نصنع المستقبل
من اجل مصر

ذرة حُبنا - فوبيا العقل

خبر كدة فى السريع
علماء يقتربون من اكتشاف «الذرة الإلهية»

http://www.almasryalyoum.com/node/548206




طبعا بغض النظر عن عنوان الخبر..اللى واضح اوووووووووووووى ان المصرى اليوم عاملاه كدة علشان " تاكل عيش " و تبيع و تخلّى الناس تقرا
المهم, قريت تعليق جوة الخبر
بكل بساطة ,واحد كاتب: هذه احد خزعبلات العلمانيين فى الغرب اللادينى 
ليه بقى؟
علشان حسنى مبارك و نظامه و ممولوه الخونه الحقيقيين هم اللى بوظوا التعليم فى مصر
و بناء عليه باظ العقل و الفكر المصرى و انتشر الجهل و التخلف و الغباء دون استقصاء


الحقيقة الاولى فى هذة التدوينه:
كلمة(الذرة الإلهية) مقصود بها الذرة الصغيرة البدائية جدددددددا المسئولة عن تماسك جميييع جزيئات المادة بكل انواعها و اشكالها
بل قد يقصد بها انها اول ذرة او اول شئ خلقة الله
و ليس المقصود بها:عدم الاعتراف بوجود خالق اصلا..كما يفكر الاخ اللى كاتب الكومنت

*- انا لما اقول:وزير التربية و التعليم الجديد "هيخلق" مناخ صحى لتعليم الاطفال

يبقى كدة انا علمانية لا دينيه ملحدة ماسونية لمجرد استخدامى كلمه(خلق) ؟؟
هل استخدامى كلمه (خلق) ينفى صفة الخلق من الله عز و جل و يضعها فى  وزير التربية و التعليم ؟؟


*- لما اقول ان مارادونا إله كرة القدم..هل معنى كدة ان كرة القدم فيه ناس بيعبدوها..و مارادونا هو الإله بتاعها؟؟
هل استخدامى هنا لكلمه (إله) نفت صفة الألوهية عن الله عز و جل..ووضعتها فى مارادونا؟؟


الاجابة على السؤالين: لا اكيييييييييد
بس للتوضيح فى السؤال التانى
انا اقصد ان مارادونا مالووووووووووش زى فى لعب كرة القدم..و استخدامى لكلمه(اله) استخدام كصيغة مبالغة و ليس اكثر

فى2001 تقريبا -على ما اتذكر- تم استنساخ النعجة دوللى..و ساعتها سمعنا اصوات معارضة كتييييييير لأستخدام العلم فى حاجة شبة الخلق
اننا بنتحكم فى كائن و بنخلقه خلقا تاما و دة حرام و غلط و..و ..و...
بغض النظر برضة عن الجدال الدائر عن:لو هنستخدم الاستنساخ فى حاجة مفيدة يبقى قشطه..لو فى حاجة مش مفيدة يبقى لا ياعم
و ازااااااااااااااااااااااااااى دة يحصل؟ الخلق صفة لربنا فقط ولا يجوز اطلاقها على البشر
فأنا احب انهى الجدال دة بسطر واحد فقط:
لو كان الاستنساخ يخالف -او بمعنى اصح- يكاد يقترب من قانون ربانى و إلهى واحد فقط..ما كان الله سمح للبشر ان يستخدموه و يكتشفوه اصلا


انا دلوقتى هتمنى حاجتين
*اولا: ياليتنا زى الغرب فى العلم بتاعهم
و حتى لا يخرج علينا عقل غبى متخلف اخر و يقول: أتريدين ان نكون مثلهم فى علمانيهم و كفرهم
فأنا أحب استبق هذا العقل الغبى و اقول: محاسبة البشر ان كانوا مؤمنين ام لا..ان كانوا يستحقون الجنة ام النار هو شئ من اختصاص الله
اما كونك تريد الخروج عن ذلك بتكفيرك لهذا..و تأثيمك لهذه, فهو خروج و نفى صفة الحساب و ان الله فقط هو من سيحاسب
فـَ إعلم انك ذلك الكافر الذى تتهمه بالخروج عن النص
كمان حاجة:انا بقول:ياريتنا زى الغرب فى علمهم..ليه مش ناخد الحلو من هنا على الحلو من هنا و نعملوا شوب الفخفخينة التمام؟
نعمل" حضارة " نضيفة بقى
فيها حاجة لو استفدنا من علومهم..بعد ما هم استفادوا لقرون من علم العرب و تقدموا على حسابنا؟؟
فيها حاجة؟؟


*ثانيا:  نفوووووق بقى و نفتح ادمغتنا..يارب نشوف مصر متقدمة
المهم نفتح عقولنا للعلوم..مش نكفرها

طب دة انا مرة قريت نكتة بتقول: الامريكى يخترع ..فيبدأ الصينيون بالتصنيع.. و المُنتـَج يستخدمه الانجليز..ليتجادل العرب:هل هو حلال ام حرام؟

ياريت بجد نفتح عقولنا
علشان منجيش بعد كدة نستغرب من كلبة  تقلع هدومها و تقول حريه

هيييية..امك انت

"الوحش الصغير و الوحش الكبير" - اسئلة بريئة جدا

مبارك قعد 30 سنة يحكمنا ,و اكتر سنة لاقى فيها معارضة كانت2010

الترتيب من اليسار:الوحش الصغير
ثم على اليمين:الوحش الكبير..سبحان الذى جعل الجحش ,وحشًا

"مش محتاجة دماغ يعنى..هو مقعدش فى 2011 غير 25 يوم بس..اما 2010 فهى اللى جمعت و ركزت غضب السنين اللى قبلها عليه"


الـ30 سنه دول كان مفعل فيهم قانون الطوارئ و كان فيه قمع للحريات بطريقة رهيبة
و ساعتها قرأنا جملة: (انا عُمرى 29 سنة طوارئ)
و حصلت الثورة فى2011 بعد 30 سنه مبارك
و مات فيها اكتر من800 شهيد
وانهزم الوحش الصغير


الوحش الكبير بقى هو نسخة - مُضاعفة - طبق الاصل من الوحش الصغير
اكتر سنة لاقى فيها معارضة هى السنه دى....2011
لأنه ظهر فى الصورة...و ظهر على حقيقته
قانون الطوارئ لسه شغال و معاه المحاكمات العسكرية يعنى 2×1
قمع الحريات موجود بالضعف
كلنا قرأنا جملة: (انا عُمرى 59 سنة حكم العسكر)
السنه الجاية دى (2012) هتكون تتمة 60 سنة حكم العسكر لمصر
60 سنة...=30 ×2
مش قلت لكم الوحش الكبير كل حاجة فيه تساوى الضعف من الوحش الصغير
ان شاء الله هتحصل الثورة فى2012 بعد 60 سنة حكم عسكر
و ان شاء الله هيقع الوحش الكبير


 نقلا من تويتر: انا مش متأكد اذا كانت نهاية العالم هاتبقا في 2012 , لكن أنا متأكد من انها هاتكون نهاية المجلس العسكري .


حبة اسئلة بقى - بريئة جدا والله -....لينا

هنستنى ايه يحصل علشان نقوم؟..اقصد ليه بنقوم من على الكنبة وقت الكوارث بس؟
يا ترى قد ايه الدماء اللى هتسيل علشان الوحش الكبير يقع؟

يا ترى,لو قرر المشير انة يتنحى بالزوق...مين الراجل اللى هيقف وراه؟..زى ما حصل مع عمو عمر سليمان كدة؟
كيف سمحنا لمبارك بتحرير احدى يداه و مدها إلينا ليصافحنا ؟

زى ما احنا شايفين كدة فى الصورة ,طنطاوى هو زراع اخرى للمخلوع

ازاى بجد سمحنا لمبارك ان دراعه...يحكم الثورة....و يحاكمها
ازاى ارتضينا نقبل ايد ممدودة الينا و هى ملوثة بدمائنا و دماء اخواتنا
يعنى ايه اللى حصل دة و ازاااااى؟ مش فاهمه انا الصراحة




فيه نكتة  قرأتها على الفيس بوك بتقول :
عاجل: وفاة خروف في احد المجازر والتشريح المبدئى يرجح أن السبب ابتلاعه لفافة برسيم وجزار الداخلية ينفى ان يكون هنالك خرفان اساسا
نشطاء على الفيس بوك يطلقون صفحة " كلنا خروف العيد"

مضحكة....صح؟
لكن واقعية الصراحة
اصل الانسان عندهم(عند العسكر يعنى) بقى بيتساوى بالحيوان
و دة محصلش فى عهد المخلوع.......فى عهد المخلوع كنا فى ادنى درجات البشر
لكن كنا بشر
محصلش و تمت مساوتنا بالحيوانات

و ليه لا؟...مش مصدقيننى ؟؟
الدليل على كلامى: ان المجلس عَـيّـد قبل الكل و دبح -اقصد دهس- المصريين عند ماسبيرو
نحن  اصبحنا فى زمن الخرفان فيه تُذبح...و الانسان فيه يُدهس,او يُعتقل عسكريا
ان شاء الله نهايتهم 2012

لمعلومات اكتر عن فضائح المجلس العسكرى و الحل لذلك
اضغط على اللينك دة : تدوينة النهاية 2012
او من على الفيس بوك : النهاية 2012

النهاية2012

النهاية

دايما بتكون انفجار...

كارثة مثلا او حاجه كبيره تحصل

لأن معروف  ان الضغط. .. بيولد الانفجار

بالظبط زى الكوب الفارغ..لما تقعد تصب فيه المياه

و مستوى المياه يعّلى ... و يعّلى

لحد ما توصل للحافة

و فجـأه ....

 الماء ينسكب منها

و يبدأ يغرق اللى حواليه

 ودى بتكون

.

.

.

. 

.

.

. 

النهاية

لكن دى بتكون بداية

بداية ان:الماء المسكوب يبدأ يغرق  الاماكن الجافة

زرع بلا ماء مثلا...او صحراء

والنهاية اللى فوق دى...بتكون بداية حاجة جديدة

حاجة حلوة

حاجة كويسة 

و دة اللى حصل بالظبط فى الثورة

فاكرين من2008 و2009 و2010

خلاص المصرى كرامتة ضايعة...التوريث قادم لا محالة...حكم مبارك حكم ازلى

احتكار..كل يومين حادثة: قطر او عبارة او دويقة او.....او.....إلخ

اعياد المسيحيين فيها تفجير لكنيسة او فتنة

قلنا خلاص..المصرى اتعلم الخضوع و الخنوع علشان اكل عيشه

الشرطة كانت متجبرة اوى..و عااااااادى جدا انها تهين كرامة المواطن 

الاسعار غالية..و فيه ازمة فى العيش و الانابيب و الطماطم

كان فيه قمع حريات..و تقييد للفكر

المرتبات ضعيفة..كان فيه رشاوى..كان فيه فساد

 مع احترامنا للكبار-و انظر لهم بعين دامعة على هذا الموقف-للأسف سكتوا و قبلوا بكل دة

علشان فاكرين ان المشى جنب الحيطه كويس جدا

كانوا فاكرين انهم بيعملوا علشان ابنائهم و علشان المستقبل

كانوا  بيعملوا علشانى..و علشانك وعلشان كل واحد فينا

بس مكانوش يعرفوا ان الحيطة اللى ماشيين جنبها طول الوقت...ممكن تقع على دماغهم

و بدأ دق المسامير  فى نعش النظام السابق

كرامة المصرى فى الخارج-حادثة نجع حمادى-خالد سعيد-قمع الحريات للمدونين

الحكومة الذكية-تصريحات احمد عز-انتخابات مجلس الشعب المزورة-حادثه كنيسة القديسين و سيد بلال-و اخيرا,ثورة تونس

ثورة تونس اللى اظهرت للمصريين انهم ممكن يقفوا قدام المدرعة...و المدرعة هى اللى تتأذى

ثورة تونس هى اللى وضحت للمصرى ان قوتنا..فى لمّتنا

و حصلت الثورة

وحصل الأتى:

النهاية

 دايما بتكون انفجار...

لأن معروف  ان الضغط. .. بيولد الانفجار

 بالظبط زى الكوب الفارغ..لما تقعد تصب فيه المياه

 و مستوى المياه يعّلى ... و يعّلى

 لحد ما توصل للحافة

 و فجـأه ....

 الماء ينسكب منها

 و يبدأ يغرق اللى حواليه

و دة اللى حصل فى الثورة

الناس انفجرت

و اهتز عرش مبارك وانتصرت الثورة عليه

ودى كانت بداية جديدة  لزمن جديد...و نهاية نظام ظالم

لكن 

انا مش شرحت الكلام دة فوق و آن اوان شرحه

بعد ما المياه بدأت تنسكب من الكوب

بيبدأ يفضى شوية

بس الفراغ اللى بيفضى دة مش بيبقى بحجم الكوب كله....لأ

و نبدأ تانى نصب المياه

و مستوى المياه يعّلى ... و يعّلى

لحد ما توصل للحافة

و فجـأه ....

 الماء ينسكب منها

و يبدأ يغرق اللى حواليه

 ودى بتكون

النهاية

........

و البداية

طب.........ليه بيحصل كدة تانى؟

ليه رجعنا نصب مياه فى الكوب تانى؟؟
علشان الفساد دة نظام كامل بحاله...لو انهار كله,هينهار معاه كل شئ

خلّينا نراجع
-يوم 28 يناير بليل لما الجيش نزل..ساعتها هم قالوا هنحمى الثورة
الجيش اصلا نزل علشان يحمى النظام من السقوط

اكيد كلنا فاكرين المدرعة اللى اتحرقت يوم 28 بليل لما الناس اكتشفت انها بتنقل ذخيرة للأمن المركزى
هو مين اللى اعطى اوامر للجيش انه ينزل البلد؟ طنطاوى ولا مبارك

-ماننساش برضة اجتماع مبارك مع المجلس الاعلى يوم 29 يناير

-محدش ينسى يوم 30 يناير لما طيارات أف-16 كانت بتطير على ارتفاع منخفض مستعدة لدك ميدان التحرير

(و يُقال ان امريكا تدخلت وقتها لأن الطيارات أف-16 دى امريكيه الصنع..كمان تلاحظوا ان الدبابات اللى نزلت معظمها روسى و قديمة من ايام الحرب ,اما الدبابات الابرأمز الامريكى الحديثة..عدد قليل جدا هو اللى نزل الشوارع..دة لان استعمال مصر للسلاح الامريكى لقتل المتظاهريين كان هيسوء سمعة السلاح الامريكى فى العالم و يقولوا:امريكا اعطت مصر سلاح علشان تقتل شعبها)

الدليل على كدة-لو تفتكروا-...تانى يوم اوباما خرج بتصريح: مبارك يجب ان يتنحى

-محدش ينسى اجتماع  المجلس العسكرى مع عمر سليمان ومبارك يوم 1 فبراير لمتابعه السيطرة على الأمن

-محدش ينسى ازااااى الجيش ممنعش البلطجية انهم يدخلوا ميدان التحرير يوم 2 فبراير(معركة الجمل)

الكلام دة بالنسبة لاول اسبوع من الثورة
والمفروض كنا نفهم من وقتها ان الجيش مش معانا

اللى بعد كدة واضح

كشف العذرية-مهزلة القبض على و قتل ضباط 8 ابريل-استفتاء 19 مارس(نعم للأستقرار=نعم للمجلس)واللى طلعوا بعديه اعلان دستورى

غير المواد المستفتى عليها خاااااااااالص

كمان اعتقال و خطف النشطاء(مايكل نبيل بــسبب مدونته-على الحلبى لرسمة جرافيتى على الحائط ضد فلول النظام السابق-احمد عبد الكريم...و غيرهم كتييييييييير)-البيان العسكرى رقم 45 و 50 اللى هو اصلا كارثة وفضيحة تظهر كذب المجلس العسكرى

محدش ينسى احداث السفارة

واعتصام ماسبيرو الاول و اهالى الشهداء لما ضربتهم الشرطة العسكرية

و فض اعتصام التحرير يوم 5 سبتمبر...بعدها الأمن المركزى ضرب مشجعين الاهلى

ودة اللى خلّى التراس اهلاوى و زمالكاوى ينزلوا التحرير يوم9\9..و يروحوا محاكمة مبارك علشان اهالى الشهداء اللى ضربهم الامن المركزى
يومها,عبدة و انصار المخلوع لم يأتوا

محدش ينسى شهادة المشير اللى اتسربت...لما الحماااااااااااااااااااااااااااااااااااااااار شهد مع مبارك

مع انه كان قايل قبل كدة ان جائت له اوامر بدك الميدان

اكيييييييييييييييييد طبعا الاوامر كانت جاية من مبارك

محدش ينسى اعتصام  يوم 1 اكتوبر و يوم 6 اكتوبر اللى تم فضهم بالقوة برضة
محدش ينسى اللى حصل عند ماسبيرو يوم 9 اكتوبر و الجريمة الدوليه اللى حصلت
يعنى ايه مدرعة تدوس على بشر بيطالبوا بحقوقهم؟
يختلفوا بأيه كدة عن سلوبودان ميلوسفيتش لما كان بيدهس مسلمين كوسوفو بالدبابات؟
يختلفوا بأيه كدة عن اسرائيل لما جرافة عسكرية دهست الناشطة الامريكية فى 2003؟

محدش يقدر ينسى مينا دانيال اللى كان فى كل حته فى ميدان التحرير
محدش ينسى الحكم فى قضية قتل خالد سعيد(7 سنين للقتله)..مع ان دة قتل عمد
كمان حكم المحكمه الادارية العليا بانشاء لجان فى السفارات للتصويت للمصرين فى الخارج
و المجلس تجاهل و رفض دة بحجة ان مافيش عدد قضاة يكفوا
محدش ينسى المحاكمات العسكرية اللى لسه شغاله لحد دلوقتى
محدش ينسى التصريح العسكرى اللى بيقول ان رئيس مصر القادم لا غير مسموح له ان يعين وزير الدفاع...يعنى الجيش فعلا ناوى يغتت غتاته التنين على اى رئيس جاى
ناوى يدس انفه و يحشرها فى كل حاجة ,مش دى بس...و البلد اللى ليها ريسيين..تغرق
و محدش ينسى رئيس القضاء العسكرى لما صرح وقال:لا يجوز قانونا المطالبة بعدم محاكمة المدنيين عسكريا
و بصراحة كدة..مادام العسكر شايفيين ان مش من حقنا نفتح بقنا اصلا...يبقى  احنا الشعب هنسقط شرعيتكم قريب اووووووووى
علشان اكييييييييييييييييييييييد الشرعية للشعب..حق الحياه للشعب... و القوة للشعب
(انا لم اجد لينك للخبر على موقع الشروق..لكن وجدت الجريدة المطبوعة..اعمل داونلود من هنا و اقرا الخبر فى عدد 25 اكتوبر2011 الصفحة الثالثه...او شوف احمد المسلمانى وهو بيقول الخبر من هنا فى الفيديو دة فى الدقيقة 4:20)
طبعا كل دة كوم..و حمله تأييد طنطاوى كوم تانى خالص...بيفكرونى بالبوسترات اللى عملها نظام مبارك يوم 25 يناير تحت عنوان:مسيرة حب وتأييد للقائد و الرئيس


الحريه الفكرية دة موضوع لوحدة..دة شئ كفيل ان تحصل ثورة تانية

تكميم الاعلام و فرض قيد على حرية الراى و النشر

يعنى ايه قضية قتل المتظاهرين تبقى قضية رأى عام..و عليها حظر نشر؟

ازاااااااى يعنى .....و فين الحرية؟؟

فين الحريه اذا كان قد تم اقتحام قناه الجزيرة مرتين
و قناه الحرة مرة
و قناه 25 مرة

و حدث ايقاف جريدة صوت الأمة
و جريدة الفجر كمان

و تعليق برنامج يسرى فودة بسبب انهم مش عايزين علاء الاسوانى وابراهيم عيسى يتكلموا

و ايقاف برنامج الحلم المصرى على القناه الاولى الارضية بعد مداخلة دكتور ايمن نور

محدش كمان يقدر ينسى دور ماسبيرو فى الاحد الدامى لما هو كان سبب فى اشعال الفتنة
لما المذيعة الشمطاء رشا مجدي حرضت الناس انهم ينزلوا يضربوا فى الاقباط و يدافعوا عن الجيش
هو مين اللى معاه سلاح علشان يدافع؟
المفروض كنا نتوقع حاجة زى كدة...مادام الاعلام دة فى ايد الحكومة والعسكر

طيب...دلوقتى الكوب بدأ يمتلئ تانى و على حافة الكارثة لتانى مرة فى اقل من سنة
بس الطفل اللى بيلعب بالمياه دة طلع ذكى فى تانى مرة..علشان الماء مش يفيض و يغرق الدنيا
الطفل دة جه قرب حافة الكوب...عمل ثقب صغير..المياه تنزل منة لكى يقلل الضغط
الثقب او الخرم دة  اسمه(حزب الكنبة)
المجلس-او الطفل دة- عرف يفرق الشعب بين حزب كنبة واسلاميين متطرفين و متطرفين المهجر
المجلس هو اللى بيرعى ارهاب السلفيين..علشان يتقال حكم العسكر ولا حكم السلفيين
المجلس هو السبب فى الفتنة فى مصر.. علشان شايفها زريعة للأحتفاظ بالحكم
المجلس مش هيسلم الحكم لحكومه مدنية غير بعد ما يكون اخد اللى هو عايزة
المجلس باقٍ فى الحكم حتى2013..شوفتوا حصل ايه فى الـ9 شهور اللى فاتت؟
المجلس ناوى يعمل اكتر و اكتر و اكتر و اكتر فى السنتين الجايين علشان يفضل فى الحكم
المجلس مستعد يقتل نص الشعب و يبيع النص التانى علشان يختفظ لنفسة بالحكم
المجلس متباطئ و متواطئ فى محاكمة قلته الثوار و محكامه الفاسدين
المجلس دة راعى الارهاب..و دى سياسة عالمية معروفة
المجلس بيعمل صفقات حقيره لحسابه...مش لحساب مصر
و المجلس اللى زى دة.............مينفعناش و ميلزمناش


الجرح لسه سخن يا مجلس

الكوب لم ينسكب ماءه كله
و حزب الكنبة قادر على قلب موازين الامور لو تم توعيته
انت بس مسيطر عليه بالتلفزيون بتاعك
و ان شاء الله...دة هيتغير

اما بالنسبة للسلفيين اللى بيتحدوا كل شئ من اول الشيخ على جمعة مرورا بالقانون المدنى و الحقوق البشرية

احب اقول لهم:والله انتوا اللى هتكفرونا وهتكرهوا الناس فى الاسلام

علشان اللى برة هيقولوا:بصوا الاسلام؟!!

وتخلوا الكلاب  اللى قاعدين فى واشنطن يفتحوا بقهم ويتكلموا علينا وهم كمان يقولوا تقسيم واعلان جنوب مصر دوله مسيحيه..و شوية تانى يقولوا:سيناء يبقى ليها حكم ذاتى...و النوبة تنفصل بالمرة

مصر مش ليكم يا متخلفين

مصر للمصرييين...مصر بلد واحد يا اغبياء يا متأسلمين...كفانا الله شركم
اصحوا من غفلتكم وشوفوا مين بيلعب بيكم

وبعدين لو بيحكمنا الله...هو انتوا-استغفر الله العظيم- الله؟

انتوا فاهمين يعنى ايه دوله دينية؟؟
دوله دينية يعنى يحكمها نبى او رسول...انتوا لا انبياء ولا رسل
طب ليه الرسول عليه السلام كان بيتعامل بطريقة مدنية فى مجتمع المدينة؟

كفانا الله شركم و شر الفلول

غلطنا اننا روحّنا بيوتنا يوم11 فبراير

اه غلطنا فعلا

من الاخر بقى

دلوقتى ايه الحل؟

يوم 28 اكتوبر2011 ..انا هنزل الشارع تانى بعلم مصر

المرة دى هيكون اسمها جمعة الفرصة الاخيرة

اخر فرصة ليكم..قبل ما الشعب يقوم  و يثور تانى على الظلم

اخر فرصة تنفذوا كل مطالب الثورة

و من بعد يوم الجمعة هيكون فيه تصرف تانى..علشان الناس هتنفجر

-هيكون  فيه توعية للناس..هيكون فيه ميكروفون و  شاشات عرض تروح المناطق الشعبية وتوعى حزب الكنبة باللى بتعملوه من كل الاعمال المتجبرة المتعنتة...علشان تفرحوا بالتلفزيون المصرى براحتكم

-هيكون فيه ناس كتير-وانا اولهم- بنرسم جرافيتى ضد حكم العسكر

-هيكون فيه تفجير لمبنى التلفزيون المصرى-ماسبيرو....مش عايزينه علشان احنا هنبدأ اعلام حر ,على نضافة

-هيكون فيه حصار لمقر المجلس العسكرى بمليونيه... بما ان ورقة ميدان التحرير اتحرقت

-هيكون فيه اعلان شعبى لاسقاط شرعية المجلس العسكرى...مش هتقفوا قدام ملايين

و لو على القيادة...اكييد فيه ضباط شرفاء كويسين

الشرطه وقتها غصب عنها هتشوف شغلها..وهو الشرطى ايه غير مواطن تفرغ للعمل و الخدمة المدنية

واللى مش هيشوف شغله يتسرح..المواطنين فى اللجان الشعبية يبقوا هم شرطه-نفس الصلاحيات فى منطقتهم فقط
الفاسدين فى الشرطة هيخافوا

هدفنا: اسقاط الـ19 لواء خائن...اعضاء المجلس العسكرى

والله العظيم ثلاثة يهون عليّ أن أقطع رجلي قبل أن أركعَ بها  للمجلس العسكري

و على هذا النمط..هم فاكرين انهم قاعدين على قلوبنا لحد2013..ربنا يدينا طوله العمر

مايعرفوش اننا هنرفض..و هيكتشفوا ان احنا اللى قاعدين على قلبهم واننا احنا اللى هنقرفهم فى عيشتهم

و اننا مستعدين نموت...علشان البلد دى تنضف

بس لا...مش لـ2013

اخرهم 2012...اخرهم31 ديسمبر2011

اقسم بالله العظيم....الا ترزح مصر مرة اخرى تحت اى ظلم وان من قام بثورة للخلاص من جبروت الشرطه الفاسدة فى عصر مبارك الديكتاتورى المظلم..يستطيع ان يمزق الحديد باسنانه ليروى نور الشمس
فمن ذاق و احس بطعم الحرية من قبل ,لا يمكن ان يتنازل عنها بسهوله

لذا اتعهد انا بصفتى مواطنة مصريه على ان يكون الجمعة 28 اكتوبر هو جمعة الفرصة الاخيرة

و ان تكون نهاية الحكم العسكرى ..قبل بداية 2012
وسوف ابذل فى سبيل ذلك كل غال و نفيس...فقد فاض الكوب و امتلاء الصدر بالهموم على هذا البلد
لن نسكن و لن نستكين بعد اليوم

والله على ما اقول شهيد

و يا ارفع علم مصر عالى فوق وارفع راسى معاه..يأما ارفع العلم بالمقلوب احتجاجا على ما يحدث لبلدى

اعيش حرة..او اموت بكرامة

النهاية2012
ان شاء الله
________________________________________________

لو البوست عجبك...اعمل شير
خد كلام منه و انقل
ارفع صورة علم مصر على الفيس بوك و اكتب اى جزء من الكلام دة تحتيه
وصل الكلام لكل المصريين
ابدأ اتحرك ضد العنف و الحكم العسكرى...امبارح خالد سعيد و النهاردة مينا دانيال
و بكرة هتكون انت..او انا او اخوك او خالك او جدك او اى حد يطالب بحقه

انزل مناطق شعبية وعّي الناس...اتكلم بصفتك مصرى ..مش تبع اى حزب

اتكلم و علّى صوتك...قول لأ و ارفض الظلم...اعمل لمصلحة بلدك اللى انت عشت واتربيت و بتاكل من خيرها

انقل الكلام على مدونتك او قناتك على اليوتيوب..او الوول عندك او تويتر

شير

لينكات تهمك:

مدونة مايكل نبيل سند اللى اتحبس علشانها علشان بيكشف  خيانة المجلس العسكرى
http://www.maikelnabil.com/2011/03/blog-post_07.html

جريدة الشروق-عدد يوم25 اكتوبر2011 ,الصفحة الثالثه
http://www.shorouknews.com/pdf/

شهادة المشير- اقصد الحقير- مع المخلووع
http://supermoyamoon.blogspot.com/2011/09/blog-post.html

ضباط  جيش8 ابريل الشرفاء
http://www.youtube.com/watch?v=JRTcwLvEJwg

اوضاع مصر قبل 25 يناير-فيلم وثائقى
http://www.youtube.com/watch?v=738_EReBFCs

اوضاع مصر بعد المجلس العسكرى
http://www.youtube.com/watch?v=y2OhMK_tdBc