بكرة ممكن يكون متأخر اوى

الكلام دة قديم
5\7\2010

الفيس بوك

موقع اجتماعى مشهور..-لكن المصريين لاقوا فيهم انفسهم ولاقوا الحريه على عالم النت اللى مش موجودة فى واقعهم -اللى للأسف- واقع مرير

كام ستيتوس بتتكتب فى اليوم بتعبر عن حاله المواطن المصرى من فرح وسعاده الى قلق الى تعب الى زهق من البلد

بس موقع..لاقينا فيه نفسنا وعرفنا نرسم لنفسنا الشخصيه اللى كل واحد عايزها..زى ما قالت صديقتى بالظبط

مايهمش

وزى المقوله المصريه الشهيرة:انت كنتى تدرى,فتلك مصيبه...وان كنت لا تدرى;فتلك مصيبه اكبر

ناس كتير اتكلموا على كل حاجه حصلت من مقتل خالد سعيد لمباراه انجلترا والجزائر وكاس العالم وحتى الانتخابات

وانا قلت:اية لازمه شمعه ضعيفه فى اوضه مليانه لمبات نيون

ليه انا انور واتكلم على حاجه كتييييييييييييييييييييييييييييييييييير اوى اتكلموا فيها واتكلموا احسن منى

بس قررت اتكلم لسبب انى ربطت الماضى بالحاضر واخدت بالى من حاجه ناس قليله جدا ماخدوش بالهم منها

واللى هيساعدنى فى كدة -وزعلانه موووووووووووووووووووووت وانا بقول كدة-الحمد لله انا برة مصر..عشان مايحصلش فيا اللى حصل فى خالد

او يحصل..مابقتش تفرق..وحياتى مش بقت غاليه عند الحكومه

ودة بسبب خالد

ليه خالد مات؟

السبب الاساسى انه اتقتل: انه مواطن مصرى وليه حقوق مصريه

لو عكسناها...مكنش هايموت

لو خالد مواطن امريكى وليه حقوق امريكيه..مكنش اتقتل

لو راجعنا الماضى كدة وفكرنا هنلاقى :كام قطار اتحرق والحكومه تصرف للضحايا3000جنيه فقط

للدرجه دى ثمن المواطن المصرى رخيص

كارثة العبارة تقريبا صرفوا 5000جنيه لأسر الضحايا

مش هنقارن نفسنا بدول اوروبيه متقدمه من ناحيه الفلوس

الاهمال هو الاساس

وهنا نروح لللى حصل فى شهر يناير السنه دى

فى نجع حمادى

لو فكرنا (بزاويه) تانيه

هنسأل:ايه التشابه-مش الفرق- مابين مينا فى نجع حمادى وخالد فى اسكندريه

الاتنين مصريين...الاتنين ليهم حقوق مصريه...الاتنين ماتوا بسبب اهمال النظام..الاتنين ضحيه لمجتمع وصفته دكتورة نفسيه بأنه مجتمع كله مريض نفسيا

من اول راس كبيرة..لحد اصغر نمله

وطبعا الموضوع ماوقفش عند خالد فى اسكندريه ومن قبله مينا فى نجع حمادى

بعد كدة ظهر خالد تانى وتالت ورابع وخامس فى كل الجمهوريه-اعزرونى مش حافظه اسمائهم ولا اماكن سكنهم

بس احنا مسئولين من الحكومه دى

كلكم راع وكلكم مسئول عن رعيته

مش صح كدة ولا ايه؟

كان نفسى اشوف الريس واحكى معاه.....يمكن الحكاوى دى تجيب فايده

ليه ظهر خالد؟

الشباب نفسة زهق

ليه النظام بيقتل الشباب

لما تقول: يا حكومه اتخرجنا وعايزين نشتغل..ولا نقعد على القهاوى؟

الحكومه هترد: لا طبعا يا حبيبى اشتغل واعرق واكسب واحنا معاكم عشان ننمى الشباب

طب الشباب هينموا ازاى اذا كانت الحكومه-تقريبا- بتحارب الشباب فى لقمه عيشهم وحياتهم وفلوسهم

والنتيجه ان الشباب بقى عاطل وقاعد على القهاوى ومعاهوش فلوس ويقرر ينسطل ويسرق

والشباب النضيف اللى عايش على النت وعارف مساوئ النظام بقى معرض فى اى وقت للقتل وبقى مباح دمهم لو هايكشف ظابط فاسد..عشان احنا فى دوله شعبها هايعمم ويقول ان نظام الشرطه كله فاسد

فالنظام لازم يحمى نفسه...شجرة الحريه تروى بدماء الوطنين من وقت لأخر؟؟؟

مصر هى امى؟

اه

بالظبط

امنا بتضربنا وبتغصبنا نعمل حاجات ممكن نكون مش شايفين ليها لازمه وساعات بنكررهها وبنتمنالها الموت وانها ماتكونش موجودة و اننا كبرنا بس ماننكرش كلنا بنحبها فى الاخر

هى نفس الام اللى بتشجعنا لما نعمل حاجة حلوة وتكافئنا وتدعمنا اننا نعمل الاحسن

هى نفس الام اللى كانت بتتفرج مع بنتها على فيديو لبنت اوروبيه بترسم على الرمل,وقالتلها ليه انتى مش زيها

وهى نفس الام اللى البنت قالتلها:يا امى انا لو عملت زيها كدة هاتزعقيلى وتقوليلى كفايه لعب فى الطين وقومى-احفظى- مذاكرتك..ذاكرى عشان تجيبى مجموع 96% فى الثانويه وماتلحقيش لا طب ولا هندسه وتدخلى تجارة او سياحه وفنادق وتتخرجى تتجوزى وتقعدى فى البيت

بس احنا مسئولين من الأم دى

كلكم راع وكلكم مسئول عن رعيته

مش صح كدة ولا ايه؟

ومن الاخر برضة احنا كرهنا نظام الحكم

وتقريبا كلامى دة محاوله لقلب نظام الحكم فى مصر من اجل التغيير للأفضل والاحسن

عشان مينا فى نجع حمادى يعيش

وعشان خالد فى اسكندريه يعيش

وعشان القطارات ماتولعش والمسارح ماتتحرقش والدويقة ماتقعش والعبارة ماتغرقش

بس تفضل مشكله واحدة

احنا ماجربناش دة هايبقى ازاى؟

اصل دى مصر..ودى عقليه الناس فى مصر

عقليه عدم التغيير.لان دايما التغيير بيبقى للاوحش

سنه 1923 كانو بيغيروا حكومه كل اسبوع,والنتيجه ان الشعب كان عندة وعى سياسى كبير

لكن احنا-جيل التسعينيات على اقل تقدير- ماجربش ان حكومته تتغير

ماجربش يلعب فى كاس العالم قبل كدة

مانعرفش ازاى تتغير وازاى تتغير للاحسن وازاى نوصل لكاس العالم وازاى نلعب حلو هناك

مانعرفش الحال هايبقى ايه لما نغير الحكومه او لما نوصل كاس العالم

مافيش حل

البرادعى..باين اوى انه مستفيد من المشكله اللى حاصله بتاعه خالد

والاخوان مش ظاهرين..بيتابعوا كاس العالم تقريبا...ممكن يكونوا بيشجعوا القذائر

والحزب الوطنى بيقول: لو هديت الاوضاع هايقولوا بهدى الاوضاع عشان داخلين على انتخابات,يبقى الحل انى اتعامل بطبيعتى وعلى قانون الطوارئ بتاعى وكأن مافيش انتخابات قريبه او مافيش برادعى

اصل دى مصر..ودى عقليه الناس فى مصر

عقليه عدم التغيير.لان

دايما التغيير بيبقى للاوحش

للأسف هنتبعها..ومش هنختار

بعيد عن انى عايزة النظام يتغير..مش شايفة حد يستحق الرئاسه..حتى جمال مبارك

بس هو افضلهم

افضل الوحشين

وعلى الحال دى...مش شايفة مصر فى2012

مصر ممكن تموت

الشعب.والشرطه والحكومه والغلاء والفتن الطائفيه والاهلى والزمالك وكاس العالم والنيل والاهرامات ومكتبه اسكندريه ووزاره الخارجيه

نفسنا نتغير..التغيير فى دمنا..دة احنا المصريين

احنا اللى علمنا من الفسيخ شربات

كل يوم بيعدى وكل مشكله بتحصل احنا اللى بننتصر عليها

نفسنا. نتغير.لكن فيه حاجه غلط...مش عارفين ازاى مثلا

او بنعمل كدة ببطئ شديد ونبدأ بالصغير الاول

ونقول بكرة هانعمل وبكرة يجى الدور

بس.........

مأخدناش بالنا من حاجه

ممكن بكرة يكون متأخر اوى

انا كمان معرفش دة يتعمل ازاى

ونفسى انا كمان..نفسى فى مصر حلوة

بس اكييد هنلاقى طريقة..عشان دايما فيه طريقة

بس خايفة من نظام ممكن يقتلنى..

وأن الوقت يعدى بسرعه ويفوت

وان بكرة فعلا ممكن يكون متأخر اوى

تبقى غلطان ياللى بتقرا النووت لو كنت حاسس انى هقدم لك حل

الحل يجى منك انت.. وانت وانت وانتى وحضرتك وحضرته

=======================================================

فى الكواليس:الفيس بوك

موقع اجتماعى مشهور..-لكن المصريين لاقوا فيهم انفسهم

عشان كدة نفسى اوجه رساله لشخص مش موجود على عالم النت

عشان هو استحاله يقراها..انا بطلع اللى جوايا بس

فيه شئ انكسر والخيط الرفيع اللى بينى وبينك خلاص اتقطع

وانا بكبر..والدنيا بتتغير والوقت بيجرى

فى عنيك نظرة ميت..انا بكرهها

عشان كدة كرهتك..استمر زى ما انت كدة

خلاص