مـــصــــر

مصر دلوقتى

ايه اللى وصلها لكدة؟؟؟

 

حبه احداث ورا بعض كلنا عارفينها ولا حاجه لذكرها مرة اخرى

لكن اللى وصلنا لكدة ان الحكومه مبقتش تثق فينا كشعب

والنتيجه ان الشعب فقد الامل فى الحكومه

دة يذود ودة يذود,لحد ما ...وصلنا للى احنا فيه دلوقتى

وشوفنا تونس عملتها فى15 يناير

وقررنا كشعب(لأول مرة تقريبا  يكون قرار يوافق عليه  اغلبيه  من الشعب كله) اننا نغير من وتونس ونعمل زيها

وان يوم 25 يناير اللى بيوافق عيد الشرطه

يكون ثورة وانتفاضه المصريين على هيمنه الحكومه

يوم 25 يناير اللى جاى انا (كـبنت)هنزل الشارع علشان اجيب حقى

طب بالنسبالك انت ياللى بتقرأ الكلام دة ,ايه نظامك؟

هتفضل ساكت علشان مصر تضيع

طب ليه علم مصر مابنشوفوش غير وقت الماتشات؟؟

ليه فعلا كلمه (العلم )ارتبطت (بالماتشات) وتشجيع المنتخب

بس

فى اليوم دة انا هنزل بالعلم,يأما ارفعه عالى وارفع راسى معاه

يأما هرفعه بالمقلوب احتجاجا على سوء اوضاع مصر لحد ما تتعدل

ويااااااااااارب تتعدل فى اليوم دة بجد25 يناير

يارب بجد علشان انا مش مستعدة اشوف ايام وحشه علينا كمصريين تانى

مهو مش حرام انى احلم ببلد حلوة

وعلشان كدة لازم نتحرك

-----------------------------------------------------------------------

على صفحه خالد سعيد

لاقيت كومنت من شخص اسمه:الاب الروحى للأيمو بيقول

:تعرف يا ادمن  طول عمرى كنت مهتم بتسريحه شعر جديده

ب موبيل جديد بلبس جديد,كنت مهتم امتى تامر حسنى ينزل البومه الجديد وامتى هيفاء تعمل كليبب جديد

بس لما اندمجت معاك حسيت ان كل دة شئ تافة حاسس انى كنت مش عايش,تعرف حاسس بأى دلوقت بعد ما عرفت معنى كلامك؟

حاسس بمعنى كلمه وطن بمعنى كلمه فقر بمعنى كلمه تعذيب,حاسس بروح حبيبتى اللى ماتت فرحانه علشان بقى ليه هدف فى حياتى

وهدفى فى الحياه انى اعمل حاجه علشان أسعد شعب اصبح لا يعرف معنى السعادة

-----------------------------------------------------------------------

وانا كمصريه نفسى اوصل له رساله انى فخورة جدا بيه وان اللى زيك عمله نادره اصيله

نفسى كمان اوصل رساله للاغبياء اياهم  ومعاهم المنافقين كمان واقول لهم ان ماتفرقش ايمو من عادى من مسلم من مسيحى من ملحد

تفرق انه مصرى وبيحب مصر

ومستعد فعلا يموت علشان ترابها وعلشان مصر

مش زيكم حبه جبناء واغنام وخرفان تجروا وتهربوا

دة احسن من الف واحد منكم

مصر دى اللى صمدت اكتر من 2500 سنه ضد اى احتلال حاول يدخل لها

صمدت كلها وهتفضل لحد يوم الدين صامده

مصر دى اللى شعبها يقدر يهز جبال

-----------------------------------------------------------------------

كومنت اخر قراته على نفس البيدج من اخ تونسى حر بيقول فيه:السلام عليكم اخواننا فى مصر

لنجاح ثورتكم عليكم بما يلى:1- المظاهرات تكون ليلا وهذة تكون لها عدة فوائد,تقللون من فرص القبض عليكم ومن فرصة معرفه هوياتكم

كما تستطيعون النجاه من عمليات التصوير

2-ترهقون قوات مكافحه الشغب فأنتم تثورون ليلا وتنامون نهارا وهم فى حاله طوارئ قصوى فليلا شغب ونهارا لا يستطيعون النوم فيكونون ضعفاء

3-تمنعون عمليات الخطف وزورا الفجر

4-اياكم وعمليات الانتحار فأذا كان مصيرك الموت فليكن برصاص طاغيه

5-استغلوا الاعلام لتبليغ صوتكم فالضغط الخارجى رهيب جدا على طاغيه مصر

-----------------------------------------------------------------------

كلمه اخيرة

عايزة اوجه تحيه للشعب التونسى الحر اللى عرف يجيب حقه من بق الديكتاتور

عقبال الشعب المصرى

ويارب يتحقق اللى فى بالى ومصر تتحرر

علشان احنا مش بنتجمع ونمسك علم مصر ونهتف بأسمها غير ساعه المباريات وبس

اصبحنا نعيش فى وطن تسوده الفوضى والبطلجه

وكأن ما يحكمه هى  قوانين الغاب وفقا لعصر جديد مظلم

ويتحكم به مجموعه من البلطجيه وفقا لاهوائهم الشخصيه وليس بناء على تحمل مسئولية تجاه الشعب او الوطن

حيث تفكك الوطن وبدا فى محاربه نفسه  ونزف دم شباب ابرياء كل  ما اقترفوه من جرائم كان:حبهم لهذا الوطن

حيث انعدمت الثقه فى الحكومه واذداد الفساد وانعدمت قيمه المواطن المصرى وقد فقد الامل فى تغيير حياتى على كل المستويات

ونتيجه لذلك اصبحت اللامبالاه والتجاهل هى جزء يومى من حياه المواطن المصرى

وهو ما يشير الى موت النفس المصريه وتحولنا لعبيد لا نشعر بشئ مما حولنا

واشاره ايضا لفقدان شباب مصر لكل معانى الانتماء والحب

وما بين مواطن مصرى مؤيد لـ(أكل لقمه العيش مهما كانت) واخر مؤيد لـ(التغيير)حتى لا تظل رؤوسنا فى الرمال من الحزن

فقدت مصر هويتها

سوء الاحوال فى مصر وتونس متشابهان, فى حين ان  احرار تونس قرروا الا تموت النفس التونسيه,فثاروا وانتفضوا على الظلم والقهر

وكأن المصريين نفوسهم ماتت فعلا وتلاشت عزة النفس وسادت الامراض المجتمعيه الخبيثه المؤرقة استعدادا لموت مصر ذات نفسها

اتمنى الا نكتفى بأحتجاجات الانترنت والفيس بوك فقط

بل ينبغى ان تخرج الجماهير المصريه مثلما فعل احرار تونس ليعبروا عن غضبهم

فمصر ليست موجوده على الفيس بوك,مصر هى واقعنا الذى نعيشه ونعانى منه

-----------------------------------------------------------------------

-----------------------------------------------------------------------

النووت كدة خلصت,واللى جاى دى تعليقات على الاحداث من ناس اعرفهم

تعليق قرأته عند الصديقة سارة الاسكافى  على اللى بيحصل فى مصر واللى حصل فى تونس:

لمَّا بيثوروا التوانسة و احنا نشكى من السجاير! لمَّا سعر اللحمة يغلى بعد علقة من الجزاير! لما ننزل ع الشوارع بعد كل ماتش نهتف! لما مانلمش زبالة و كله يرمى و كله يحدف! لما ناس تديها ويسكى و ناس بتشرب م القلل! لما تشتمنا الجزيرة و ميلودى تتحدى الملل! اه يا شعب عليكوا بدعى ربنا يهدى القلوب .. مش مبارك والبرادعى لأ ده فيكوا انتوا العيوب .. حد زعلان من كلامى؟ 

-----------------------------------------------------------------------

اغنيه: انا بابا يله محمد اسامه

على فساد مصر الحالى

http://www.youtube.com/watch?v=hefvZowh8_4

-----------------------------------------------------------------------

لو قررت تنزل او عايز تنزل 

دى ارشادات ليك

http://www.youtube.com/watch?v=ujtIdyfjgWU

ويارب النصر لمصر

انا مسيحية

الموقف دة حصل فى اواخر شهر 11 اللى فات ف2010

ونسيته

 

وافتكرته لما حصل اللى حصل

اعتبروها قصة..... لكن جميع الاحداث حقيقة 100% تماما

كان يوم احد وكان هو يوم اجازتى من الكليه,قررت انا و باقى اصحابى اننا نعمل حاجه  جديده اليوم دة الصبح

قررنا نروح مجمع الكليات النظرية(تجارة- اداب –حقوق – تربيه – سياحه وفنادق)عندنا فى اسكندرية وبالمرة نقعد مع صحابنا  شوية بما انهم كدة كدة هناك

انا كنت اول الواصلين وقعدت مع صحبتى(امال) لحد ما (بسمه) تخلص المحاضرة بتاعتها

بسمه خلصت و(نهى) كمان وصلت

قعدنا  كلنا نتجول فى المجمع لحد ما باقى الشله تيجى

بصراحة,المجمع فاضل له عربيه روبابيكيا ويبقى شارع عادى جدا من الشوارع المصرية,ولا حاجه للسور المحيط به وقتها

(ناردين) كمان وصلت وقعدنا شويه وبعدين هى راحت هى ونهى علشان يجيبوا نسكافية

واحنا قعدنا فى شارع كدة مابين كلية حقوق وكلية سياحه

انا وامال وبسمه

فجأه كدة بدأ يقرب علينا رجل(لم نكن بحاجه لمخ,لكى ندرك انه ينتمى لجماعة الاخوان المسلمين) بلحيته البغيضة

بدأ يتكلم مع امال  عن الحجاب لماذا هى غير محجبه حتى الأن

امال ردها كان ديبلوماسى اوى ,هى قالت: انا عارفة ان الحجاب حلو ومن زمان اوى وهو حلو,بس انا مش عايزة اكون محجبه

بسمه- الهادئه دائما – جلست تسمع الكلام اللى بيتقال ومن منظرها  عرفت انها هى كمان بتفكر ترد زى امال بدبلوماسيه لو الراجل سألها

وانا فضلت السكوت علشان خلاص الموضوع خلص بالنسبة لنا ...دى  حريه شخصيه,وهو عرف ارائنا وهايمشى

فى اللحظه دى وصلت  نهى بالنسكافية كانت سمعت كلام الاخ دة ,وقالت له(دى مسيحية) ,امال ابتسمت ورجعت الورقه للراجل وقالت له(شوف حد تانى غيرى يستفيد بالكلام اللى مكتوب هنا)اما الرجل فوجهه تبدل 180 درجه ما ان علم انه بيكلم واحدة مسيحيه الديانه

بص لأمال وبسمه  بقرف وقال: هداكما الله للأسلام.

وبص لى انا وقال: انتى ازاى تقعدى مع اتنين مسيحين؟

لا يجوز اصلا السلام عليهم,لا يجوز اننا نعيد عليهم فى اعيادهم ولا يجوز الكلام معهم

ومن شابه قوم فهو منهم ودول اصلا مش مؤمنات,وبمصاحبتك لهم,فأنتى  كأنك بقيتى زيهم

طبعا الحمد لله ان ناردين مكنتش موجوده وقت  ما الراجل دة بيقول الكلام دة

ناردين...و اسم الدلع بتاعها  نارو او نيرا,بمعنى اصح:اى حاجه فيها نار

بسبب ان لسانها بينقط نار ,يا حظه الاسود اللى يرتطم بيها فى يوم من الايام

اللى كان هيحصل انها كانت" هتشطفه" تمام,وترجعه بيته يبكى على اليوم اللى قرر ينضم للأخوان المسلمين فيه لعدم علمه بوجود النوعيه دى من الناس

ناردين مكنتش موجوده,بس انا كنت موجوده............

اللى حصل  بالظبط انى قمت هزقته

انت عبيط ولا شكلك كدة,انت متخلف وستين متخلف انك تفكر كدة

يعنى ايه لا يجوز ويعنى ايه مؤمنات ومش مؤمنات

هو انت مين الحمار ابن الحمار (ايوة انا قلت كدة فعلا) اللى عينك تقيم الناس اصلا وعلى اساس ايه؟

ومين الحمار ابن الحمار اللى عينك تحاسب الناس

دة مسلم يبقى حلو ,ودة مسيحى يبقى وحش وكافر ومضل ومش مؤمن

هو الحساب عندك انت ولا عند ربنا؟؟

هو مين اللى بيحاسب فى الاخرة ,انت ولا ربنا

ياسمين ورانيا وصلوا...وشايفين مويا بتزعق,يبقى اكيد فيه مشكله

بسمه قامت اخدت  رانيا على جمب(علشان رانيا لسانها فالت وكانت هترجع الولد بيته  بيعيط بر ضة دة اذا مكنش اخدها على القسم وعمل لها محضر سب وقذف,دة اذا كان لسه فية نفس ولسه عايش بعد ما تضربه وتعمل له عاهه مستديمه فى وجهه وتجرجره على القسم تعمل محضر تعدى على انثى  دة اذا ادركت انه مجرد بيتخانق معايا لأى سبب وبعدين تجرجره على امن الدوله وتكبر الموضوع بحجه الفتنه الطائفيه اذا ادركت انه بيتكلم فى موضوع الاسلام والمسيحيه)

ايوة رانيا مفتريه وتعملها,

المهم راحوا وقفوا على جمب بعيد خالص عننا علشان رانيا ماتسمعش

وانا بدات اوطى صوتى وكملت كلام

انت مالكش تحكم على حد بسبب  دينه  واللى فهمك كدة يبقى متخلف

الولد رد  عليا رد مستفز:ان الدين عند الله الاسلام

امال شدتنى علشان اقعد ودخلت تهدى الموضوع:ربنا يهدينا كلنا  وكل واحد حر فى المعتقد بتاعه ,وفرصة سعيده.

الولد رد تانى:ربنا يهديكى للأسلام.ودة واجبى انى اقولك كدة علشان انا شايف ان الاسلام صح وان الدين عند الله الاسلام والدليل هو 1400 سنه والاسلام لسه موجود وبينتشر

انا كنت زهقت من كلام الولد ودخلت مرحله " الاستبياع" المعروفه عنى واللى شعارها بيكون,عليا وعلى اعدائى

ناردين كانت وصلت بالنسكافيه,ووقفت ورا الولد تسمع

و شافت انى انا اللى بتكلم ....فهى فضلت السكوت

امال ردت :وانا شايفة ان المسيحيه  هى الدين الصحيح ,ربنا يهديك للمسيحيه

انا دخلت على طول وقلت:لو على الاقدميه,المسيحيه بقالها 2000, لو على كلامك يبقى المسيحيه هى الديانه الاصح والانجح فى العالم,بس لتانى مرة بقولك اللى هيحاسب فى الاخر فى يوم القيامه هو ربنا مش انت ولا مئه من الجهله اللى زيك اللى مايعرفوش حتى التاريخ بيقول ايه,وانت مالكش تحاسب اى  واحدة على انها لابسه حجاب او لا  لأن دى حريه شخصيه,فما بالك بالمحاسبه على الديانه

الولد رد تانى: انا بنصحكم,وان الدين عند الله الاسلام

انا رديت:وانا مسيحيه وبقولك ان الدين  عند الله هو الدين المسيحى

------------------------------------------------------------------------------------------------------

كون ان واحدة لابسه طرحه على شعرها  تقف وتقول انا مسيحيه,دة صدمه لأى حد

فجاه حسيت ان الولد هيحط ايديه فى جيبه ويطلع دبابه بمدفع 155مم ومعاها  صاروخ بالستى

وايده التانيه فيها ار بى جيه وجهاز لاسلكى يؤمر الطيران الحربى انه يضربنى بالصواريخ النوويه وصواريخ سكود

------------------------------------------------------------------------------------------------------

طب على افتراض ان اللى جه فى بالكم حصل فعلا

فيها مشاكل؟؟؟

ان انا دلوقتى  مسيحيه ومالكش انك تحاسبنى ديانتى ايه

انت مجرد شخص من 6 مليار ونص عايشين على الكوكب ,بمعنى اصح كلامك مهما كان فهو مش هايفرق معايا بقرش واحد

انا مسيحيه ودول اخواتى ودمى والكلام  دة  بيكون فى يوم الحساب عند رب الحساب

يعنى ماتفتحش بقك  اصلا  ,علشان انت ذات نفسك ممكن تكتشف فى يوم الحساب ان المسيحيه هى الدين الصح

لأن دى حاجه ربنا بس اللى يعرفها,وانت مجرد بشر حقير واكيد ماتعرفش ربنا تفكيره ازاى

ربنا دة ساب لينا حريه الاختيار ,بس مش  عملك  علينا رئيس او نبى علشان انت اللى تقول مين الصح ومين الغلط

انا شايفة المسيحيه صح,وانت شايف الاسلام صح

طب وبعدين؟؟؟احنا هنعرف  مين الصح فى الاخرة,مش دلوقتى يعنى

يعنى بمعنى اصح الورقه بتاعتك دى تروح تبلها وتشرب  المياه اللى نازله منها

وانا هبقى اصلى لك ربنا يشفيك

ياريت تفتح مخك وتفهم

ومالكش انك تقول ان المسيحيه غلط

ارجع اكمل لكم باقى الموقف

امال كانت بتشدنى وبتقوللى تعالى نروح لبسمه علشان المحاضرة بتاعتك هتبدأ

وسيبنا الاخ دة واقف زى الملابس الداخليه على حبل مقطوع مش عارف يفتح بقه

وبس

عملا بالمبدأ القائل: قد اختلف معك ,لكنى على استعداد للموت فى سبيلك

انا دمى اتحرق لأصحابى

وبصراحه معتقدش ان ناردين او رانيا كانوا هيردوا الرد بتاعى دة على الاخ اياه دة

كتبت نووت قبل كدة واسمها بالدم ودة اللينك بتاعها

http://supermoyamoon.blogspot.com/2010_11_01_archive.html

بتكلم عن الحاجات اللى ممكن ادفع الدم ثمن ويكون رخيص اوى  ليها

والموقف دة كان اختبار ليا

صحابى ,بالدم

ودينهم ,بالدم

حياتى ,بالدم

مـصـر ,بالدم

الموضوع دلوقتى تطور معايا

مبقاش عمرو دياب وانغام والاهلى واحمد خالد توفيق بس هم اللى بالدم

بقى كمان معاهم تامر حسنى والزمالك و(الكاتب الفاشل السخيف اياه) هم كمان بالدم

هم كمان مستعدة افديهم بالدم..لمجرد انهم مصريين

فعلا: الاخوان المتأسلمين هم اقذر واحقر فئه خلقها الله على الارض

وزى ما قال  مؤسس الجماعه بعد ان راى شنعاء فعله:هم ليسوا بأخواننا,وليسوا بمسلمين

دول حاطين منهج لنفسهم,انت ضده يبقى انت كافر.....حتى لو بتصلى وبتصوم الفرائض والسنه   وبتعمل كل حاجه

دول مصلحتهم مع الكسبان,مش مع مصر

لو مصر غرقت,دول اول ناس هينطوا منها

فيه ناس من مصلحتهم ان مصر تقع

ودول من ضمنهم

واللى عمل تفجير الكنيسة برضة من ضمنهم

الكنيسه  دى اللى حضرت فيها  فرح مدرستى المفضله  فى اولى ثانوى

كلمه اخيرة

حياتى ,بالدم

مـصـر ,بالدم

رجوعا لباقى الموقف

رحنا  انا وامال  ياسمين وناردين للمكان اللى المفروض بسمه اخدت رانيا فيه

طبعا كلنا ماشيين ببطئ وبنفكر فى اللى حصل واكتر واحدة بتفكر  كانت ناردين وخصوصا لأنها ماشيه ورانا

وانا بعرف ناردين لما بتفكر بعمق

ياسمين كانت واقفة تتفرج من ساعه ما جت هى و رانيا ومكنتش فاهمه الموضوع بدأ ازاى

ولما حكينالها ,قالت: دى حريه شخصيه ,انا اهو غير محجبه مسلمه,الاكتر انى بلعب موسيقى يعنى كان هيكفرنى

 بسمه  اخدت رانيا وكانوا بيلفوا  فى المجمع وبسمه فهمت رانيا اننا بنتكلم فى موضوع(الحزب الوطنى ولا الاخوان) ورانيا ملهاش فى السياسه

بعدها بأسبوع او اقل بس رانيا عرفت الموضوع الحقيقى وقالت ان اقل  تصرف  ليها كان انها تسيب الولد وتمشى

بسبب اقتناعها بالمثل القائل: عندما تنبح الكلاب ,فقط الكلاب ترد

:@

رانيا شتمتنى علشان رديت اصلا

ياريتها وقفت معانا